Օջախային նեյրոդերմիտը մաշկային հիվանդություն է, որը միաժամանակ ունի նյարդային և ալերգիկ բնույթ։ Հիվանդությունը քրոնիկական է՝ ընթանում է սրացումներով և ռեմիսիաներով( ախտադադարներով): Հանդիպում է բնակչության 1,5%-ի շրջանում, ավելի հաճախ կանանց մոտ քան տղամարդկանց։

Օջախային նեյրոդերմիտի առաջացման մեխանիզմը վերջնականապես պարզված չէ, սակայն կարևոր նշանակություն ունեն ժառանգական նախատրամադրվածությունը, ալերգիկ և նյարդաբանական ռեակցիաները։

Կլինիկորեն դրսևորվում է քորով, առաջանում են առողջ մաշկից տարբերվող կլորավուն օջախներ, որոնք պատված են փոքրիկ քորվող հանգուցիկներվ և ունեն յուրահատուկ փայլուն տեսք։ Համեմատած առողջ մաշկի՝ օջախներում մաշկի մակերևութապատկերը ավելի արտահայտված է։

Օջախային նեյրոդերմիտի բուժումը բազմակոմպոնենտ է, կարող է ներառել հետևյալ բաղադրիչները՝

• Առողջ ապրելակերպի վարում
• Կոպիտ և վնասող հագուստի բացառում
• Հակահիստամինային միջոցներ՝ քորը նվազեցնելու համար
• Տեղային գլյուկոկորտիկոստերոիդներ, խոնավացնող միջոցներ և այլն։